قالت الفنانة فيفي عبده، إن الله منحها نعما كثيرة مثل حب الناس والنجاح والشهرة، مؤكدة أنها لا تزال تحاول الحفاظ على مستواها، ودائما تدعي الله وتقول “إديني الصحة والعمر، وأكمل مع ولادي وجمهوري اللي بحبه، لأن جمهوري عيلتي”.
وأضافت فيفي عبده، في حوارها مع الإعلامية بسمة وهبة مقدمة برنامج “العرافة”، على قناة المحور المصرية: “أنا مش قوية خالص، أنا باخد القوة لأن طول عمري بشتغل مع رجالة ورايا، عندي 150 موسيقي بيشتغلوا معايا، يعني 150 بيت أنا فاتحاهم، لو ضحكت لهم يستهتروا ولو إديتهم الوش البلاستيك خلاص”.
وتابعت: “بتسند على ربنا ومعنديش حاجة تانية، وبتسند على دعاء الأم وحب الناس، وده اللي بعتبره الكنز، الناس بتدعي لي من غير ما أعرف مين دول، وممكن أتسند على الراجل لأنه عمود البيت، الراجل الحنون اللي يعرف قيمة الست”.
وسألتها الإعلامية بسمة وهبة، وقالت: “في زواج كان بيبقى عندك مشكلة، بتقوي ومش بيهمك، هل النهاردة لو فيفي عبده في بينها مشكلة ورجل الأعمال الديراوي، تضعف شوية عشان الدنيا تمشي وعاوزة كنف راجل”.
وقالت فيفي: “مقدرش أقول كده، احتفاظي بالراجل مش بيبقى بالطريقة دي، لأن مش على راسي بطحة إني أخاف من حد، أنا بتكلم على سجيتي، وجوزي عرف يحتويني وعرف قيمتي وده مهم جدا”.
وعرضت الإعلامية بسمة وهبة، مقطع فيديو مؤثر للفنانة الراحلة تحية كاريوكا، التي قالت إن فيفي عبده تقدم لها مساعدات كبيرة.
وردت فيفي عبده قائلة: “الكلام ده جدعنة؟! مش جديد على الراقصات على فكرة، كل الراقصات معروف عنهم الجدعنة زي الحاجة تحية ونجوى فؤاد وغيرهم وبوسي ودينا واللي ماتوا”.
قالت فيفي عبده، إن نجوى فؤاد لم تقل أبدا إنها في حاجة إلى أي مساعدة، موضحةً: “الوجود عند الفنان مش إننا نديله فلوس، ممكن يبقى معاه فلوس بس عاوز ناس، وبشر، من حقها إنها تمثل وتبقى أم أو خالة”.
وأضافت: “أنا متطمنة عليها وعارفة إن حالتها كويسة، معرفتش تعبر لما قالت عاوزة آكل عيش، نجوى فؤاد مش عارفة تعبر عن مشاعرها الحقيقية”.
واستنكرت فيفي عبده، سؤال حول تفكيرها في اعتزال الرقص أثناء فترة اكتئابها، مبدية تعجبها: «أعتزل الرقص ليه؟! يعني أعتزل الحياة!».