Loading...كشف المطرب هاني شاكر النقاب عن تفاصيل أزمته مع مطرب المهرجانات حمو بيكا، متطرقاً إلى سبب عدم حصوله على تصريح النقابة.
وأوضح شاكر، أثناء استضافته في برنامج “مصر جديدة” على شاشة قناة etc، أن حمو بيكا أدين بحكم نهائي بالحبس سنتين بسبب تهجمه على نقابة المهن الموسيقية.
وأضاف نقيب المهن الموسيقية: “بالفيديوهات، بيكا تهجم على النقابة وقال أنا هحرق النقابة وأنا هاجي أهد النقابة وحاجات كده، وخد حكم بالحبس سنتين بعد رفع الشؤون القانونية قضية عليه”.
وتابع: “وقبل التنفيذ على طول أنا والمجلس المحترم الحمد لله تنازلنا عن القضية عشان مايتحبسش، بس للأسف الشديد هو طلع في رمضان يدعي عليّا”.
ووجه شاكر حديثه لمطرب المهرجانات، قائلاً: “يعني إنت طالع في رمضان تدعي عليا وانت ماشفتش مني غير كل خير، وعمري ما عملتلك حاجة تأذيك”.
وقال النقيب: “لو كنا نفذنا الحكم كان زمانه لسه قاعد في [سجن] طرة مكانش طلع في التلفزيون، وكنا عملنا معاه الحوار في طرة”، وأكمل بتهكم: “عشان كده كتر خيره هو طلع دعا عليّا في رمضان”.
أما عن تدخل والدة بيكا، قال شاكر: “والدته كلمتني كتير وقت ما كان هيتحبس وأثرت فيّا لأني أنا أولاً وأخيراً أب، وأنا مفيش بيني وبينه أي حاجة، بس الفن مش بالطيبة ومش بالعياط”.
واختتم نقيب المهن الموسيقية في مصر: “مش كل اللي يعيط يبقى معاه حق، انت دخلت الامتحان مرتين وسقطت، وهذا لم يحدث مع أي حد، أنا كنقيب أروح أغني بداله، أروح امتحن بداله، يعني أعمل إيه طيب؟”.
تعود المشاكل بين نقيب الموسيقيين ومطرب المهرجانات إلى أكثر من عامين، عندما أصدرت نقابة المهن الموسيقية بيانا بإلغاء حفل المطرب حمو بيكا في منطقة العجمي بالإسكندرية.
وعلق وقتها بيكا قائلا: “نقابة المهن الموسيقية تقوم بمنع الشباب من الغناء، وأنا بيهم من غيرهم هشتغل، دي بلدي ولدي جمهور كبير يقوم بسماعي”.
وأضاف: “الناس دي عاملين نفسهم مغنيين، وعاملين نفسهم ملحنين، لكن هما في الأصل مش مغنيين ومش ملحنين، أنا عايز أعرف النقابة دي مين بيمثلها، لو الأستاذ هاني شاكر بيمثلها يجى يشوف النقابة”.
وتابع: “المرة دي أنا عملت لايف، المرة الجاية هنزل الشارع والناس كلها هتنزل معايا، وهاجي هنا هكسر في النقابة، ومحدش هيمنعنى غير الموت، ولو على الحبس أنا مش خايف من أي حاجة، وهتحبس هنا وهموت هنا، والمرة الجاية كلنا هننزل نقول مش عايزين هاني شاكر، إحنا مش معترفين بالفن بتاعك، وانتوا مش مغنيين ولا إحنا معترفين بيكم فنياً، المرة الجاية يكون في شتيمة وقلة أدب، متشكرين للنقابة اللي بيقولوا عليها نقابة”.
